НЄТ СМИСЛА О ТИМ ПИСАЦ?!

Славко Винаї

Бешедовали зме зоз “шефом” тих новинох о рижних темох, хтори би требало, або нє, понаписовац до нїх. Гварим новинох, бо нє знам чи адекватне мено МАК (Младосц Активносц Креативносц). Та так, дошли зме случайно, нєнароком, до теми секс. Секс. Ага, чи то табу-тема чи нє, голєм цо ше дотика Руснацох? Видата збирка руских еротских приповедкох, ениґмох, вицох, у котрей описани подїї вязани за сексуални живот Руснацох. Описани су зоз звичайним, народним, народу блїзким язиком

Читач, кед пречита кнїжку, задовольно ше ошмихує и констатує: “Ах, яки зме добри шугає, гунцути, нялкоше, бетяре итд...“ Крашнє то звучи, алє ше мнє видзи же би за Керестур видац даяки свойофайтови додаток тей кнїжочки под назву: “Свойо нє сцеме – цудзе примаме”. Чом? Га, прето: прето же у Керестуре коло тих стварох дакус иншаки обставини и ситуация.

Но, алє, о тим ви шицко добре знаце, вироятнє и вецей як я. Знаю шицки и заш лєм роби ше по старим – та, вец вредзи о тим писац, приповедац и розбивац главу, або авта?

Споминам Керестур, криж Господнї, цо є 20 000 езром мац и глава, центер Руснацох, рускосци. Шицки епитети хтори краша тот валал падаю до води и  поставаю шмишни пред збуванями и подїями хтори ше у нїм случую у остатнїх 10, а можебуц и вецей рокох. Но, та цо ше случує?

 – Керестурски дзивчата ше гаша зоз странцами. Аларм, узбуна, цензура, нашо дзивчата нє таки, нєправда, як можеш таке дацо повесц? Правда! Робя то у автох, на окраїскох валала (лєшик, беґель, “призма”, базен, поля...). Єдна з єдним, єдна з двома, трома, штирома... (патрели сце порно филми?!). хтора як може, сце, або муши.

Нє сцел бим ґлобализовац, алє ствари уж ґлобализовани. Побешедуйце зоз даєдним од тих “странцох”, лєм нє гуторце же сце зоз Керестура, та дознаце и як, и кельо, и хтори – та дознаце шицко. Но, нє болєло би мнє кед би ше бешедовало о пар конкретних менох або особох; болї ме тото же кажди “странєц” поучени зоз искуством з Керестура. Дума и бешедує слїдуюце:

 – “Чловече, идз до Керестура! Пожич од пайташа авто, по можлївосци зоз касетофоном и найновшима “Пинк нулти рекордс“ виданями ( читай ултра, меґа, денс, поп, фолк, кич, шунд, бляк, фуй музику). Пожич даскельо златни ланцущки, “модерне” облєчиво, пожич мобилни, пейджер, може и пиштоль и идз до Керестура и перцай кельо ци душа жада! Лєм, меркуй, кед ци сербски нє мацерински, нє одкривай то нїзач, бо ши годзен обстац од тунєй забави за єдну ноц. А там шицки тоти ствари: авто, ланци, музика, облєчиво нї нач, то ци лєм маска за тото прецо идзеш. Бо, Керестур ци формула и способ як ше добре поперцац у Керестуре, а можеш виберац шицки возрости, шицки висини, фарби власох, фризури, вибераш як на тацни! Ей, тото мнє болї же праве вони – странци ширя о нас таки глас. Дзивки ше понукаю як дурни, а хлапци шедза, патра и пию.

По їх приповедки, випада же шицки Керестурки таки як сом описал, а керестурски хлапци будали и морони, бо нє робя нїч.Чи?

Людзе, га, нє така ситуация, озда праве же нє така?!

Алє, цо робиц? Биц странцох, виганяц их, преврацац им авта, гнац их од наших добрих и наївних дзивчаточкох, а вец рано тебе милиция оганя, бо це тоти исти дзивчатка, за чию ши ше “чесц” трепал по варошу, крашнє приявя  милициї?! Гей, тебе приявя, а нє своїх принцох на пожичених автох, у пожичених шматох, зоз пожиченима ланцущками, касетами, роздумованями, идеями, справованьом. Приявя тебе, бо бешедуєш о звичайних темох зоз таким звичайним, руским язиком, бо нє циґанїш же маш авта, хижи, злата, пенєжи, пиштолї и цо ци я знам цо. Приявя тебе, бо ти бул тот цо погубел їх “любов”, гоч и сами знаю яка то любов, думам же знаю, алє нє сцу припознац и малюю себе у глави сказки о принцох нєбесних автох. Идземе далєй?

Вец приходза перверзиї. Шицко тото цо сце мали нагоду видзиц на ТВ Били Манастир, “Палма“ або на видео-касети. Єдино сом ище нє чул за АНИМАЛ СЕЮ, гоч, хто зна, чи даєден нє приведзе зоз собу и свойого найлєпшого пайташа “ПАС – МОЙ ПРИЯТЕЛЬ”, та, гат, уж кед му є пайташ, най подзеля и тото уживанє вєдно. Перверзиї, можебуц, звуча ище застрашуюцо, алє нє таке то страшне. Вежню троме-штирме странци єдну дзивку, вона ше залюби до єдного, е, а тот єден як прави пайташ, понеже ше сам задоволї, понукнє дакус розваги и пайташом. Дзивка у полю, на гауби авта нє ма Бог зна яки, вибор: лєбо будзе бита и пешо ше враци сама дому, або после орґийох, кед ше хлапци засица и задоволя (шицки), крашнє ю одвежу дому, або голєм на початок валала. Як приставаю на таке дацо – два-три позауха, “пуцу“ опрез очох, та увидзиш як приставаю.

 – О, Господи, пребач же це споминам у таким тексту, “кої“ то тим дзивком, “кої“ то нам ?!

Но, алє, як цо сом и насловел тот текст, нєт смисла о тим писац, прето же ше шицко тото случує уж длугши час, нїхто о тим анї нє штудира, ту и там ше дахто опиянї, прелєє ше му нови, побиє ше зоз странцами и на тим ше закончує шицко; а подли глас? Подли глас нас биє, затупює, упрепасцує и фекалує шицко добре у валалє.

Можеме ми буц и найшколованши и найтолерантнєйши и найотворенши и центер шицким добрим котри ше боря за валал и народ.

Можеме о тим приповедац сами себе, цешиц ше медзи собу, сами можеме. А вонка будз цихо и нє споминай же ши Керестурец, бо це вишмею, набию роги або ци поведза: “Пребач, нє знал сом же ши зоз Керестура, га, нє гварел би сом ци тото... алє, наисце, “кої“ вам?