Характер Конана настал двацетих рокох прешлого вику у глави тексажского особеняка Роберта Е. Ховарда. То були звичайни приповедки хтори виходзели у цалком анонимних часописох и нє прицаговали нїяку повагу. Аж после шмерци автора Конан преложени до стрипу и ту достава векшу популарносц. Перши епизоди були робени по ориґиналних приповедкох, алє их нє було вельо, та даскелї други авторе пробовали писац, зоз вецей лєбо менєй успиху у подобним стилу. Конан якого нєшка познаме, визуелно настал шейдзешатих рокох и жаноровски є дрилєни ґу супергеройом, дзе му баш и нє место. Зняти и филм хтори добре поробени по ориґиналних приповедкох, лєм дакус помишаних. Теди Конан постал сучасна митолоґийна фиґура. Други филм, пре ґаладносц за пенєжом, тотални фияско, а надалєй сом мал нагоду видзиц и рисовани филм и серию, та и даєдни новши епизоди стрипа над хторима мож лєм плакац и лєпше кед би их вообще нє було. Пре прилагодзованє голивудским пролетерским вредносцом, сценаристи заблукали до тунїх шаблонох помодарства. Малогражданске медиокритетство упива до себе вшелїяки девияциї и намага ше буц интересантни, аж и зоз прилапйованьом боемства. Теди слабосц напита у технолоґийно оможлївеним комформизме, самей себе дзелї вшелїяки права. Знаме же права питаю тоти хтори их очивисно нє маю, бо кед би их мали нє мали би ше им цо питац. Можеме писац же шицки людзе маю право на воду за пице, медзитим, тому хтори ше найдзе у стред пустинї тото право нє барз поможе. Плебеєц би ше гнївал на систему, а интелектуалєц-уметнїк би го намальовал як умера од смияду и видумал нови тренд.

Автор Конана цали свой живот препровадзел у занєдзбаним стредку и нє провадзел нїяки тренди. И други його подоби як цо то Краль Кул, Ред Соня, Соломон Кейн воюю сами. Нїхто з нїх, а найменєй Конан нє сце импресионовац громаду людзох, анї писатель нє сце по кажду цену здобуц цо вецей читачох. Основна идея задумац и пробовац дочаровац езотеричну историю швета помедзи Адамом и писану историю.

То час дзивши од нашого кед примордиялни чловек у морю креви и трапези утвердзує себе як краля природи и швета. Сама перцепция интелиґенциї ище нє доробена, односно обачованє материї нє докончене и чаривнїком нє представя проблем материялизовац нєчисти сили у форми вшелїяких монструмох. Физична форма вельо екстремнєйша, атмосфера полна зоз випаренями мочарох у хторих гнїє нєдавно задавени предходни швет, зоз хторим чловек нє пановал.

Братство? Шлєбода? Єднакосц? Красни жаданя и пажерносц маджамбох сиґурно нє поможу же би ше тот швет дзвигнул на даяки висши духовни уровень. Труд, закладанє, надлюдска усиловносц пророка, врача, чи героя браня Швета од гнїву Бога. Конан мержи привидзеня, фанатизем, заблудзеня и чарну маґию з дна души. По його симетриянскей митолоґиї ма ше бориц цали живот, и кед заслужи, док умре, пуща го пред Бога Крома зоз хторим за столом шедза и пию найвекши людзе. Ту му ше Бог будзе питац же у чим тайна челїка. Кед нє будзе знац, з нього ше буду вишмейовац, а кед потрафи даю му же би шеднул з нїма и пил вино хторе му буду служиц найкрасши жени. Позадина того нового миту нє вицадзена з малого мозґу, алє праве зоз фраґментох историї и з єй початкох хтори нам познати. Ту компиловани Хиперборея и Аезґард, Пикти и Кушити... Нєшка ше з тим шветом пасує Марти Мистерия. Сама националносц Конана нє занєдзбана. Наглашене поднєбє одкадз походзи раса хтора покори швет. Праве нєможлїви условия одредзую квалитети чловека як поєдинца, а якбачу и народа у цалосци. Добри чловек зоз нєщесца дацо и научи, а подли постанє ище горши.

Конанов меч пиє крев своїх нєприятельох зоз задовольством и без санованя. Малодушносц сиґурно нє за ньго. Кажди прави герой антисоциялна особа. Знаюци огранїченосц наших читачох на стрейт политику и кинки секс треба надпомнуц шлїдуюце: Тезей бул вельки герой при старих грекох и його воєна схопносц була добре позната и богом на Олимпу. Кед го видзела Атена Палада у єдней войни, рушела по ньго же би го одведла горе на Олимп. Медзитим, Тезей ше так барз занєсол же почал виривац мозґи своїх нєприятельох. Тото ше Атени зґадзело и одврацело ю од єй намири.

Надчловек нє особа. То идеал хторому ше намага. То нє наш сушед Арнолд Шварценеґер (Шрафциґер) анї нє Бил Ґейц. Же Памела (Санела) Андерсон идеална жена, зложел би ше и Конан, бо у його чаше, док бул млади, шицки були таки намальовани. Знаме же кажде дружтво, кед посцигло свойо идеали, почнє опадовац а цивилизация годна препаднуц, кед досцигнє свой зенит. Конан надчловек з початку людскей файти, рубе глави монструмом и розчисцує жем за нас – його менєй вредних потомкох. Вон на концу постал вельки и силни краль, док я, у найлєпшим случаю, можем пойсц до голивуду на Беверли Хилс (Хлївс) 90210 и нокаутирац Брендона.

И док ше тота наша цивилизация страци у чаше и наш швет будзе забути, и док людзе уж буду розмазани и крегки як мотилї, прилєци блуднїца Бабалон на своєй жвири зоз седем главами и знїщи чловека. Ма тото шицко смисла? Ша, док Конан черка зоз Кромом, зоз тим уж нє ма нїч.