Make your own free website on Tripod.com

РУСКИ МЕДИЙ У ВОЙВОДЯНСКЕЙ ЗАГРАДКИ


Интервю з министром за информованє у АП Войводини Рафаилом Русковским

Министер за информованє у АП Войводини РАФАИЛ РУСКОВСКИ твердзи же би Войводина требала мац свойо електронски медиї, точнєйше (ВРТ Войводянску радио-телевизию). Чи условия и квалитети новинарох задоволюю критериї за правенє ВРТ. Дзе у тей приповедки РТС, а дзе руска редакция.

Яки реформи у информованю планує исте министерство у АП Войводини?

Реформа информованя задумана там дзе нє у шоре, односно дзе шкрипи. Ми як секретарият (министерство) за информованє предложели реформу у двох вельких голдинґох, у Форуму и Дньовнїку, понеже ту єст наисце вельо проблеми. Длуства тих двох вельких хижох превозиходза рочни буджет Скупштини автономней покраїни Войводини, а нажаль, за єден рок, гоч зме дали даяки можлївосци же би ше людзе почали справовац тарґовищно и одвичательно, нїч нє рушело на лєпше. Ми предкладаме и даваме и тераз можлївосц управним одбором обидвом хижом же би прилагодзели свойо дїлованє же би зробели дацо на злєпшованю своєй орґанизациї. Министерство за информованє, з оглядом же видзело же з того нє будзе нїч, предложело же би ше обидва хижи назад врацели до дружтвеного маєтку и такой после закону о приватизациї приватизовали, а же би ше охабело тото цо общи дружтвени интерес, точнєйше интерес Скупштини АП Войводини, а то новинки и редакциї. Шицко понад того, ми твердзиме же нє ефикасне и нє рентабилне кед ше находзи у державних рукох. Жадаме заєднїцки служби як роботну заєднїцу, друкарню єдну и другу, т.є. шицко цо нам провадзаце а цо нєпотребне же би ше то такой приватизовало и же би нашло свойого правого власнїка та вец би тоти два голдинґи, Форум и Дньовнїк, з векшей часци були профитабилни.

Антерфиле:

Сиґурно сом прешвечени же кед ше пошвидко нє враци ТВ Нови Сад АП Войводини, вец я особнє будзем мушиц цошка зробиц. Нє сцем повесц же я будзем мушиц звалїц даяки табли, як цо то зробел Ненад Чанак, алє вшелїяк же нєт вецей причини же би по конєц рока ТВ Нови Сад чи ТВ Войводина, уж як ше будзе волац, нє подпадла под полну инґеренцию САП Войводини.

Чи думаце же ше РТС враци до рукох Войводини?

РТС нє, алє Телевизия Нови Сад гей. Алє сиґурно я прешвечени сом же кед ше пошвидко нє враци, вец я особнє будзем мушиц цошка зробиц. Нє сцем повесц же я будзем мушиц звалїц даяки табли, як цо то зробел Ненад Чанак, алє вшелїяк, нєт вецей причини же би по конєц рока ТВ Нови Сад чи ТВ Войводина уж як ше будзе волац, нє подпадла под полну инґеренцию САП Войводини, а то значи, окрем сновательних правох и управяцких тиж так и самостойносц жирорахунок, реґистарция у привредним суду як окремного правного лїца и то нам барз важне. Важне прето же зме вец годни вжац лєбо пожичиц, лєбо вєдно ше порадзиц з привреду Войводини, же би ше по системи взайомного хасну подзвигли уровень, технолоґийни и технїчни уровень, нашей телевизиї. Бо, правда же тераз людзе у ТВ нє маю основни условия за роботу и то ше муши меняц, а їх сцерпенє вицека.

Антерфиле:

Дзепоєдни телевизиї у Нємецкей виражели жаданє за сотруднїцтво. Тераз зме у началних прегваркох. Маме зробени проєкт и Войводянскей радио телевизиї скрацено ВРТ. Затераз остава же ТВ Нови Сад, котра состойна часц РТС, и будзе уствари, косцанїк за початок ВРТ-у котра будзе под подполну инґеренцию Скупштини АП Войводини.

Цо конкретно поробиц?

 Явяли зме ше на вецей адреси же би нам дахто одвонка помогнул у смислу донацийох або колеґиялней помоци и дзепоєдни телевизиї у Нємецкей виражели жаданє за сотруднїцтво. Тераз зме у началних прегваркох. Маме зробени проєкт и Войводянскей радио телевизиї скрацено ВРТ. Жадаме же би ше и дзепоєдни други ствари тирвацше  ришовали. Затераз остава же ТВ Нови Сад, котра состойна часц РТС, и будзе уствари, косцанїк за початок ВРТ-у котра будзе под подполну инґеренцию Скупштини АП Войводини.

Чи у загради буду Руснаци?

 Гей, вшелїяк же буду. Єст проблеми коло того же цо будзе покраїнски сервис, алє то завиши од нового закону о радио дифузиї, алє я думам же попри Руснацох, Словацох, Мадярох, Румунох и Сербох, же вшелїяк ше ту найдзе места и за Ромох и за Українцох. У Войводини, без огляду кельо то дакому чежко, програма ше будзе емитовац у покраїнским явним радио дифузним сервису, значи на радию и телевизиї, на 8, 9 а можебуц и 10 язикох.

Як ше будзе робиц у новей Войводянскей радио телевизиї и цо у тей загради (ВРТ-у) буду мац вецей Руснаци и Українци?

Нє знам чи достаню вецей чи менєй, алє я жадам єдно: же би шицки у ТВ Нови Сад мали основни условия за роботу, же би и мали редакциї мали право на авто, камеру, на исправну технїку. То значи же кед пойдзеце на терен же бисце дацо зняли, же бисце були сиґурни же то будзе квалитетно зазначени и емитовани. И жадаме же би ше термини на ТВ хасновали на вельо квалитетнєйши способ, кед слово о информациї. Значи 60 минутову емисию можеце пополнїц так, же можеце поволац єдного госца, а мож и так же ше у єдней годзини може направиц репортажи зоз 45 наших стредкох и вецка то ма якушик иншаку чежину и квалитет. Кадрова обнова у руских редакцийох радия и телевизиї тиж так нєобходна. Понеже я знам, то мойо колеґове з котрима сом робел роками. Нажаль, тераз су уж шицки дїдове и баби, а почали зме робиц як млади и перспективни новинаре. Значи, наисце треба вельо того зробиц кед ше жада врациц достоїнство и рускей редакциї, алє и телевизиї вообще.

Антерфиле:

То мойо колеґове з котрима сом робел роками. Нажаль, тераз су уж шицки дїдове и баби, а почали зме робиц як млади и перспективни новинаре. Наисце треба вельо того зробиц кед ше жада врациц достоїнство и рускей редакциї, алє и телевизиї вообще.

Ми як нова власц нє вершели, най так повем, кадрове штрелянє и кадрове воздзвигованє дзепоєдних других котри треба же би ношели нашу политику. А у радию пременєне руководство а и у Руским слове. У ТВ Нови Сад и тераз главни и одвичательни Єлена Карчмарчик, понеже нє було причини же би ше меняло руководство. Кед слово о новинарох, вшелїяк же нови закон о роботних одношеньох оможлїви дакус векшу шлєбоду шицким тим котри нє задовольни зоз тима котри нє задовольни зоз квалитетом роботи. Вецей би требало пременїц роздумованє новинарох, без огляду на партию котра на власци, новинаре перше муша превозисц страх т.є. аутоцензуру, вец важна дзека за роботу, а то значи же треба врациц до редакциї младих новинарох и вшелїяк же єден од важних факторох наградзованє за квалитет роботи. Кажде хто ше може уклопиц до одвичательного новинарства треба же би робел, без огляду у котрей странки бул и за котри новини пред октоберску револуцию писал. То єдно зявенє котре ше будзе зявйовац у шицких, та и руских редакцийох. Пошвидко ше новинарство будзе предавац на тарґовищу, та гоч то и на державней радио и ТВ. Значи, хто нє будзе приношиц квалитетни, интересантни прилоги, тот будзе мушиц буц дзешка з боку и думам же нєодлуга дожиєме тото же дзепоєдним людзом будзе поведзене же су нєдобри новинаре, нє прето же нє положели вистку о пребуваню предсидателя влади чи держави у дзепоєдним стредку на високе место, алє прето же нє можу дац од себе тото цо ше од нїх обчекує у анґажованим новинарстве. Нєшка маце приватни ТВ и радия, дзе людзе знаю же добра информация и информация котра на час дата - найдрагша.