Make your own free website on Tripod.com

АПЕЛ АБО МОЛБА



Анамария Регак

 

         Пре заєднїцки потреби нас младих, указала ше потреба а источашнє и можлївосц же бизме робели вєдно (ту думам на младих котри уключени до руских орґанизацийох), же бизме свойо цилї и идеї пласовали далєй од власного носа, а у интересу шицких нас, бо думаме же през медзисобну розгварку и заєднїцку роботу на реализациї потребох младежи, вєдно, наисце можеме посцигнуц вельо вецей як цо то постояце станє дочарює.

У наиходзацим тексту, оквирно представени правила за будуци совит котри жадаме оформиц, та зоз тей нагоди апелуєм на руски орґанизациї котри маю свою младеж у форми асоцияциї и на гевти цо лєм младежски, же би ше вияшнєли чи жадаю приступиц то такого цела. За шицки додатни информациї як и прияви, обрациц ше Борисови Варґови, предсидательови младежскей секциї Союзу Руснацох и Українцох, або Анамариї Регаковей, предсидательки орґанизациї Pact ruthenorum.

 

ПАПЕР О ПРИСТУПУ ДО СОВИТУ РУСКИХ МЛАДЕЖСКИХ ОРҐАНИЗАЦИЙОХ

 

1.  Основни циль Совиту младежских орґанизацийох (СМО) то розвиванє диялоґу и сотруднїтсва медзи рускима младежскима орґанизациями.

2.  Кажда руска нєурядова орґанизация до СМО делеґує двох членох.

3.  Делеґати у СМО муша мац медзи 18 и 35 роки.

4.  Делеґати з єдней орґанизациї муша буц супротних полох: леґинь и дзивка.

5.  Стретнуца СМО ше отримую 4 раз ро дока, у каждей рочней часци и на датум познатих руских шветох або манифестацийох. Вяри - “Мемориял Петра Ризнича Дядї”, влєце-фестивал култури Руснацох и Українцох “Червена ружа”, вєшенї-манифестация “Костельникова єшень”, вжиме-Крачун (юлиянски або григориянски).

6.  Зоз каждим стретнуцом прешедева и водзи стретнуце друга орґанизация.

7.  На першим стретнуцу ше зоз случайним вибором одредзує рядошлїд предшедаваюцих на стретнуцох и тот рядошлїд остава дїйсни без огляду на приключованє нових орґанизацийох-членох СМО.

8.  На стретнуцох, орґанизациї-члени СМО можу глєдац потримовку за свойо проєкти од других членох СМО.

9.   Стретнуце СМО будзе отримане лєм кед ма 50% присутних орґанизацийох.

10. У случаю же ше СМО нє отрима, орґанизация прдешедаваюци орґанизує шлїдуюце стретнуце.

11. Проєкт ше заєднїцки реализує кед достанє 51% потримовки орґанизацийох СМО.

12. Орґанизациї члени хтори потримали одредзени проєкт муша у нїм участвовац. Орґанизациї котри нє  давали свою потримовку одредзеним проєктом на СМО, нє муша на нїм участвовац.

Иницийяторе за снованє СМО:
Анамария Регак, предсидатель “
Pact ruthenorum
Борис Варґа, предсидатель младежскей секциї Союзу Руснацох и Українцох
 

 

Орґанизация приступнїк: ____________________________________

Делеґат 1._______________________________________

Делеґат 2._______________________________________

Печац и подпис овласценей особи _____________________________