ХТО ЗМЕ? ЦО ЗМЕ?
Анамария Регак
Ниа так. Дзешка на початку октобра того року, настала младежска орґанизация Pact ruthenorum, нї прецо инше лєм прето же зме почувствовали потребу за єдним новим и нашим, младежским маневарским простором, иншаким як цо нам то постояци понукали. Нє будзем започинац приповедку о тим же хто, дзе и кеди пришол на идею оформиц таке єдно цело, лєм прето же бим повторела тото цо ми лєм кус скорей написал Владимир Бодянец у тексту котри ше находзи у тим чишлє под насловом “Отвераванє руского ґета”. Текст цалком ясно описує прецо така потреба настала, кому и цо вона (орґанизация) ма значиц. Тиж так описує єй дїйствованє на медзинародним планє, як зоз Руснацами так и з другима.
Словко два и о мену. Же би нє приходзело до дилемох коло назвох за Руснака котри ше хасную нєшка у швеце, понеже ту уходзиме до политики котру жадаме обкеровац (нє прето же нас нє интересує, алє прето же орґанизациї котри ше медзи иншим занїмаю и зоз тим уж постоя), та зме думали же латинске мено нє будзе нїкому так барз завадзац. Першобутна идея за мено нашей орґанизациї була Pactum ruthenorum, так як би то на латинским язику требало ґраматично и звучац. Но, медзитим, пре праксу скрацованя у бешеди, а окреме такого длугого мена, вигласали зме же най то будзе Pact пре, спомла сом, ословйованє лєм цо народзеного цела. Реку, млади зме та нам ше гришки швеча и пребачую. Озда.
За символ орґанизациї вибрали зме слунечко (котре ше находзи на нашей гайд най ю наволаме реклами, на остатнїим боку). Прецо праве слунечко? Прето же ма вельо значеня и поруку котру ми жадаме пренєсц, и символично и ґеометрийно. Охабям на роздумованє!
Сама орґанизация, т. є. єй структура знука, випатра так: шицки єй члени творя Форум котри вибера Совит од пейцох членох зоз своїх шорох, а тиж так и предсидателя и подпредсидатля котри члени совиту по функциї. Иснує и цело котре зме наволали “30+” у котрим члени гевти цо нам вше дзечни помогнуц, алє вони нє можу буц вибрани до орґанох орґанизациї, понеже Статут за полноважних членох одредзує гевтих од 16 по 30 роки. Задумане (ище нє оформене) же би исновали и два цела, а то тим координаторох, котри би помагал ношительом идейох виробиц проєкт и конкуровац за средства (кед будзе потребне), а тиж так и после реализованого проєкта направиц евалуацию, и повратну информацию о тим же цо и кельо зоз проєкту реализоване и на яки способ оценєне. Зоз тима информациями оперовал би “медия тим” котри би тото мал пласовац и информовац явносц зоз нашу роботу. Орґанизация хвильково ма 30 активних членох, зоз рижних местох дзе жию Руснаци, як и тих цо уж члени и велїх других орґанизацийох.
Затераз реализовани даскельо проєкти. Хто читал “Руске слово” под час “Тижня дзецка” могол видзиц же перши реализовани проєкт бул “Дзецински пияц старих бавискох”, як реализация идеї Танї Бодянцовей, а на хторим дзеци заробели коло 7 000 динари котри жадаю подаровац даєдному дому за дзеци.... Тиж так, реализована и младежска “Костельникова єшень”, котра и надалєй будзе у режиї Pacta. Та ту и “Мак”, и “Литературне слово”. Тото сом начишлєла лєм прето же бим указала цо и на яки способ ми робиме. Най ми пребача тоти чийо проєкти ту нє спомнути а реализовани су. Нєт смисла писац о идейох тераз, понеже будзе написане док буду реализовани, а при нас младих, голєм идеї єст, та и роботи будзе.
Цо ше финансийох дотика, находзиме их зоз фондох котри потримую нашо конкретни проєкти.
Нам важни проєкт котри бизме пошвидко сцели реализовац: то формованє Совиту младежских орґанизацийох, чийо идейни ношителє Борис Варґа и Анамария Регак, дзе би кажда орґанизация до Совиту посилала своїх двох делеґатох же бизме рижни задумки вєдно могли реализовац, алє и премосциц рижни нєпорозуменя котри наставаю кед єдни сотрудзую зоз другима...
Могла бим писац ище вельо о нас, алє факт остава же ше на иншаки способ мушиме вибориц за свойо место под зводом дзе уж исную вельо моцнєйши и старши орґанизациї.