ХТО "ДОБИЄ", А ХТО "УРВЕ"

Анамария Регак

Кед зме Войводянє, требали бизме (кед ше ми вообще дацо питаме), дефиновац статус териториї на хторей жиєме, як покраїну, АП, републику..., лєбо можеме наприклад, задумовац же у тим жиєме.

Випатра ше указує нагода же бизме “свой пенєж сами трошели”, а кед ми того постали свидоми, значи же зме и дозрели же бизме то робели, тє. же бизме жили у АП. З оглядом же ше кажда децентрализована обласц, а поготов кед є так ясно “по велїх указательох”розлична од других єдинкох, справує як цело котре рошнє, розвива ше и дозрева, вец нам сиґурно постава ясне же о одредзени час и тота “наша гарсцочка жеми” одрошнє, а зоз пракси таки процес нам аж и барз добре познати. Поставя ше нам питанє же чи пубертет Войводини годзен прейсц сциха? (Пре “климатски” нєвигодносци балканского терену, нє верим! ) Кед гей, чи нам, Руснацом, зоз кишенки, чи до, з оглядом же ше национална структура Войводини, на цихи способ одрастаня, чежко пременї. Вшелїяк до кишенки, процентуално спрам векшинского жительства нашей будуцей оцовщини будзе нас вецей, а урядови язик, вшелїяк, и далєй будзе сербски, цо анї нє так подло з оглядом же го уж знаме. Кед процес одрастаня, цо вельо вироятнєйше, нє прейдзе так сциха, вец хто зна...

Яки ше можлївосци отвераю, же бизме обкеровали дозреванє териториялней єдинки на котрей жиєме? Модел державного ушореня пре колорит Войводини, можебуц, требали бизме поглєдац на прикладу Италиї або Шпаниї и їх затераз удатного ришеня. Юґу подзельме на вецей реґиони, меркуюци окреме при дзелїдби же бизме обкеровали концентрацию националних меншинох у єдней реґионалней єдинки, же бизме нє виволовали сепаратистични духи, як и же бизме обкеровали зявйованє “нїби носталґиї”,спрам матичней держави (приклади познати). Войводина би представяла лєм ґеоґрафски спецификум, алє нє и економско-политични. Починам ше бац же анї то нє можлїве, бо думам же би було вельо уквилєних.

Врацме ше на Руснацох, и опитайме ше же дзе ми у тим шицким? Кед розпатриме добре, увидзиме же нам шицко єдно. Свой модус вивенди Руснаци найду як и вше, напевно з обгрунтованьом –лєм най нє будзе горше- тиж як и вше!!!