Make your own free website on Tripod.com

ИНСПИРАЦИЯ ЗА АКЦИЮ


Оля Хома

У нашей жеми у остатнїх 10 рокох число наркоманох звекшане за 300 одсто. Число звекшане и звекшує ше у цалим швеце, алє у нас ше, заш лєм, роби о причинох хтори, шлєбодно мож повесц, досц патетични (лєбо ше ми то пребарз сануєме). Вшелїяк проблем дроґи стої, рошнє, старосна гранїца ше зменшує (дроґу мож купиц у основней школи), велї з нас були на хованю наркомана, милиция  претреса на каждим крочаю... То шицко каждодньово ситуациї у животох младих, а и старших и вони нательо обични и стереотипни же ше над нїма ридко кеди задумаме, и углавним на два минути посануєме очкодованих.

Дахто на дроґи зарабя,  дахто на дроґу троши, у бависку єст вше вецей актерох. Було би и вецей кед би було вецей купидла (єден вецей, вшелїяк). И то кому яки треба: горе, долу, швидко, помали, за виход, за роботу, за розвагу... шицко цо треба у малим пакецику, циґарчку, ґомбички...  Инспирация за акцию.

Хвильково, Слоба виновати и за дзири у озону, а як би нє бул за дроґу у держави, алє дефинитивно є виновати за випарйованє дзеки и збиванє розположеня. Буц крашнє воспитани, роздумовац цо крашнє цо нє, цо кому швечи, то подполно старомодне. Геройох давно нєт, донєдавна модерни були антигероє, тераз то премахнута тема. Хто ище роздумує о пошлїдкох? Нормалне постало тото цо нїґда нє було, кед ше оправда зоз револтом. А револт, як характеристика младих, остатнїх рокох витворени на першим месце прейґ дроґи, а аж вец приходза музика, мода и шицко друге цо спада под life style.

Причини такей ситуациї менєй-вецей ясни. Горе спомнути и його режим створел вигодну атмосферу, а индивидуални афинитети и причини уж каждому з нас вибудовали становиско о тим. Вельо би писац требало же би ше шицки аспекти облапели, а же би сом нє заблукала до стереотипних толкованьох. Толкую психолоґове, социолоґове, медицинаре... Мойо скромне думанє: нєт инспирациї.

Идеї у нас и коло нас, на тисячи дзвери, исто тельо понукнути драги, треба ше лєм рушиц, треба роздумац и надумац и бориц ше з проблемами хтори наиходза на вибраней драги. У култним филме Trainspotting главни актер ше єдноставно потолковал I choose not to choose Вибрал сом нє вибрац. Твардоглаво и лєнїво здал ше на героїн. Но, на тоту твардоглавосц и лєнївосц придодайме нєможлївосци на шицки боки, векшина з тих дзверох замкнута, у своїх биоґрафийох маме и бомбардованє (?!), и вец, кед одлучно надумаш забуц на шицко и руциц ше на роботу, упущиц ше до акциї, видзиш же ту кед ше ментуєш од шицких глупих терхох нє остава вельо. О тим же яки кишенки празни ганьбим ше и писац, о причинох за ставанє зоз посцелї давно зме престали роздумовац, за углом, правда, нє знаме цо нас чека, алє знаме же нє може буц нїч добре. Но, нє шицко таке чарне, як то и писня гвари, за векшину з нас ствари нєутрални. Нє бог зна як нам почало, алє ше нє шмеме поносовац, дахто ше пренашол у уметносци, дахто залюбени, дахто направел дзиру у фотелї пред телевизором... Тоти цо иншак нє могли инспирацию за акцию покурели, прелїґли... Каждодньово...

Шицки файти дроґи, углавним барз подлого квалитету, окрем войводянскей марихуани за хтору гваря же ю мож купиц у голандских coffe-shopoh. Накурени у депресивней и суїцидней ровнїни, верим же велї прежию, предриму... Питанє лєм же кельо час и роки буду сцерпезлїви же бизме ше таргли и инспирацию сами у себе пренашли и заменєли тих цо хвильково фолираю же цошка конча. Нє мушиме буц оптимисти, алє зме барз длуго були тоти други, нє?