ВЄДНО, АЛЄ У СВОЇМ ДВОРЕ

Мирослав Задрепко

После вецей як дзешец роки Милошевичовей власци, котра пропаґировала национализем, шовинизем, ксенофобию и рижни други ментални поремеценя за котри твердзела же су “нормални и препоручлїви”, медзинационални зраженя у Войводини, нажаль, престали нєсподзивац нормалних людзох. Було, а и тераз єст, шицкого - од вербалних по физични розраховйованя медзи припаднїками рижних националносцох, и то, як у варошох, так и на валалє. Варош цо ше дотика того тексту, охабиме зоз боку, а фокусираме ше на валал, и то конкретно на Коцур и проблеми мултикултуралносци у тим валалє. За початок най розяшнїме даскельо “дробнїци”.

Перше, у Коцуре нє жию лєм Серби и Руснаци, як ше то часто дума, алє єст и Мадярох, Ромох, Нємцох, Словенцох, Горватох и так далєй. Єдини проблем же ше окрем Сербох, Руснацох и, у одредзеней мири Мадярох, други асимиловали до векшинскей, значи сербскей, лєбо ридше до русинскей националней заєднїци. Так тераз маце ситуацию же ше мадярски язик у коцурскей школи вецей нє учи, гоч по остатнїм попису маце досц вельке число Коцурцох котри ше вияшнєли як Мадяре. З єдним словом, кед жиєце у Коцуре и маце дзецко котре ше ма уписац до першей класи основней школи, вец пред вами вибор помедзи сербским и руским язиком и - то вам то. Кед сце Руснак и жадаце же би вашо дзецко учело на мацеринским, односно руским язику, вец то ма и одредзени пошлїдки.

Под єден, сцели то людзе у Коцуре прилапиц лєбо нє, дзеци котри слухаю преподаваня по руски, вше буду мац даяку файту етикети. Тоту  етикету доставаю нє прето же маю три уха, лєбо два глави, алє, гоч як то шовинистично звучи, пре “огранїчени попатрунки” тих, хтори тоти етикети кладу. Руснак хтори ходзи до руского оддзелєня, углавним, будзе вельо мирнєйши и поцагнутши, як Руснак зоз сербского оддзелєня, и нїґда нє будзе знац векшински язик як Руснак котри ходзел до сербского оддзелєня. У нормалних жемох, то би нє було важне, алє у держави у котрей вам рижни пропаґандно-геркацки бидла трубели же нє важне яки ши чловек алє цо ши по националносци, то досц важне. Поготов, кед бисце ше як припаднїк даєдней меншини, нашли медзи гевтима припаднїками векшини на котрих Милошевичова идеолоґия дїствовала у подполносци. Кед бисце у таким амбиєнту прегварели по руски, були бисце, у найлєпшим случаю, вишмеяни, а у найгоршим - покалїчени. И вец ше дахто пита, гоч то нє єдина причина ґетоизациї Руснацох, же цо и чом ше то случело нам. Тому шицкому, припознали ми то лєбо нє, у одредзеней мири допринєсли и ми сами, найчастейше пре страх за власну еґзистенцию. "Čuti i plivaj", гваря Серби, а ми, Боже мой, яґда праве у тим, нашли буц добри.

Но, як є так є. Най видзиме и други бок. Руснацох котри ходзели до сербскей класи, Серби прилапюю у векшей мири як гевтих котри ходза до рускей класи. Єдна од можлївих причинох за таке дацо вироятно и то же ше вец, сцели лєбо нє, Серби и Руснаци дружа медзи собу, та и єдни и други, углавним, видза же розлика у язику нє найважнєйша ствар на швеце. Проблем лєм же остатнїх рокох нє остало вельо людзох котри так роздумую. Ище єдна “дробнїца” же вас, кед сце коцурски Руснак, а нє знаце баш перфектно бешедовац по руски, “прави” Руснаци буду покус зезац. И цо ви вец поробице – приклонїце ше векшинскому, сербскому народу, гоч, пре рижни причини, нїґда то нє будзеце, так же зоз часом маце вельки шанси же бисце залєзли до кризи националного идентитету, а кед ше то случи зоз досц вельким числом людзох, можеце бешедовац и о масовней кризи. Кед дакому нє ясне одкадз ми право же бим виношел таки податки, га ниа, виношим их на основи власного искуства, алє то нє таке важне прето же ше врацам на фабулу, точнєйше на пошлїдки шицкого гевтого цо сом горе написал.

Векшина коцурских Руснацох кед почнє виходзиц на варош бега од кафичу до кафичу, алє єст єдно-два места дзе маце типични ґето. Там, хто зна прецо, виходза лєм Руснаци и дружа ше лєм зоз Руснацами, лєбо єдноставно поведзено, ґетоизация ше наставя. Зоз другого боку, маце и други места у Коцуре дзе можеце висц, алє же би сце зробели таке дацо мушице у своєй глави розришиц даєдни ствари. Перше же вам нє будзе нїч кед видзеце даґдзе дзе нє лєм Руснаци, и друге же сце нє єство другого шору. Кед зоз тима комплексами видзеце украй, прешли сце пол драги. Вец вам лєм остава же би сце и сербску векшину убедзели до того цо и ви праве похопели. Треба повесц же анї Серби нє баранчата, и же и вони маю даяки “клики” у глави зоз хторима муша висц украй. Як перше, требали би похопиц и прилапиц же идея нєбесного народу єдна зоз векших спреводзкох котру режирал Милошевич, и же факт же цар Душан єдол зоз златну видлїчку док дзепоєдни други єдли зоз пальцами, нє вредзи вельо кед нє маш цо єсц.

Кед ше шицко поздава и пооднїма, випатра же Коцур нє найидеалнєйше место за живот Руснацох, алє то баш и нє так, пре єдноставну причину – нє думаю шицки же кед дакого упознаш найважнєйше знац же цо тота персона по националсносци и у хторей церкви ше модлї. И то, вам, одприлики то, цо ше дотика Коцура и живота Руснацох у нїм. Реално поведзено, шицко завиши од нас самих. Кед сцеме буц ровноправни, можеме то вивесц, лєм ше мушиме розраховац зоз власнима комплексами и нє трациц виру до себе. Кед то нє можеме вивесц, вец нам остава най ше и далєй ґетоизираме. И же бизме и далєй препадали.