ЖИТНЇЦА ЕВРОПИ НЄШКА

Mарко Маркович

Югославия 5. октобра подаровала швету на дланї остатню револуцию XX  вику, а Україна отворела сезону у XXI вику! Тото цо ше случує у України чежко же мож описац на бочку або два паперу алє постарам ше буц максимално змистови и ясни.

Шицко почало ище концом авґуста прешлого вику кед “до жеми препаднул” новинар найлєпших и найквалитетнєйших, за змистом, українских интернет новинох “Українска Правда” Ґеорґий Ґонґадзе, такволани Ґия. Перши реакциї на тоту подїю були досц цихи и слаби, бо, Боже мой, нє першираз ше случело же у тей держави когошик прелїґла цмота. Прешол мешац и Новинарске дружтво України написало перши озбильнєйши апел предсидательови панови Леонидови Кучмови зоз вимаганьом екстернго и без нїяких преседанох ришованя того мистичного случаю. Предсидатель, як и кажди други, обецал НДУ и народу же ше уж интензивно глєда докази о евентуалним киднапованю, або, нє дай Боже, забойству. Случай остал отворени, а новинаре и фамелия того цо нєстал страхую од найгоршого. Нїяки резултати нє було аж до януара кед ше “случел” скандал зоз пантлїку. О чим ше роби: лидер Социялистичней партиї України Олександар Мороз вишол на прес-конференцию и пред велїма присутнима уключел авдио-знїмок телефонскей бешеди зоз “главу” ДБ дзе чуц як пан Леонид лає и розказує же би ше того “...язикатого новинара, того Ґрузина, маму му й..., склонєло, бо вельо писка...”. СКАНДАЛ! Такой ше зявели вельї верзиї коло того шицкого, пантлїку ше пущало аж и у Парламенту України, предсидатель, нормално, шицко неґирал, алє збуваня котри ушлїдзели далєй указовали на тото же у тим єст вельо правди. У медзичаше, нєдалєко од Києва, у месце Тересцан, точнєйше у лєше коло того места, найдзене спалєне цело без глави и очекую ше резултати обдукциї. Новинаре чекаю як здохлїнаре, алє ютредзень патолоґове хтори окончовали обдукцию гварели же доконца роботу нє зробели, бо “рано хтошка пришол и цело щезло у чарним джипу у нєпознатим напряме...”. Єдини резултати були же при забитому нашли златни перцсень и же мал на лївей песци стари рани од ґелера. Жена Ґонґадзе, Мирослава, твердзи же персцень зоз їх зарукох, а рани од ґелера ище зоз ґрузийско-абгазкей войни 80-их рокох прешлого вику. Шицки у шоку, алє за слова Ґенералного тужителя України, пана Потебенька, ище нєт досц докази и док ше нє утвердзи прави идентитет найдзеного цела нє мож нїч повесц. Хтошка почал щиро циґанїц?!

Кулминация

Народ, окреме млади людзе и студенти почали демонстровац, у Львове ґрупа студентох основала Граждански комитет одпору “За Правду” (таке дацо як наш ОТПОР!), Україна ше дзвигала на ноги и сце правду! Алє, чи наисце так? На перших демонстрацийох у Києве (3 милиони жительох) на улїчки вишли барз мало людзе (даскельо тисячи), на других ситуация нє була анї кус лєпша, политичаре ше почали вадзиц медзи собу, дзелїц итд.. Думам же нашо искуство у 10 рокох нам уж досц указало. Приходзи и пекельни 9. марец (коинциденция), милиция биє студентох и других хтори пришли на демонстрациї, вечар гарештовали вецей як 400 студентох (185 студентох зоз Львова) и тримали их у гарешту коло 2-3 днї, а дакого 4 днї без води и єдзеня у страшних условийох за живот. Подумал сом же то, конєчно, будзе доказ шицким цо жию у України же би ше баржей почали интересовац за свою будучносц. Спреведнул сом ше: народ ше справовал флеґматично, нєзаинтересовано, правя ше шалєни док им бию дзеци... Ище сом нє стретал нацию у таким летарґичним сну як цо Українци у України. Єдини акциї правели студенти хтори наисце указали дух и же медзи ногами и нє маю так мало... Ситуация уцихла, медзинародни институциї и преса шокировани, стараю ше буц обєктивни, найсц даяки златни штредок. Кучма пошол на одпочивок на Крим, бо ше подло чувствує (у медзичаше почали вилїви на Закарпатю): нє видзи цо ше у його держави случує (або нє сце видзиц). Шлїдзи парадокс за парадоксом, олиґархи и екс-номенклатура отвераю свойо карти (а ми ище нє знаме же кельо адути у рукавох маю) и указую пред цалим шветом же хто прави ґазда у тей витрапеней жеми – Кучма марионета, алкоголичар и поражени пред цалим шветом, а вони, олиґархи, маю пенєжиска и пенєжиска и робя цо сцу. Остатнї приклад тому бул кед дали нєдовириє єдиному певному и чесному чловекови у тей держави – Викторови Юсценкови, премиєрови министрови України, котри почал нормални економски реформи, алє комушик то нє було на хасен...

Место заключеня

Почала яр, почал и гаос. У главох. Идентитет тересцанского цела ище нє утвердзени, до помоци пришли аґенти ФБИ: Пан Юсценко, хторому влада дала нєдовириє, вон тераз на чолє опозициї и враца ше якашик надїя, бо то наисце способни и мудри чловек, алє цо му то по тераз дало, указало ше. Студенти тераз роздумую як попокладац испити и колоквиї, стреднї ґенерациї ше боя же ше комунисти враца на власц, а стари... цо стари, вони у тей держави лєм совєтски роботи и на тих фреквенцийох думаю. Гваря же шицко тераз пойдзе налєпше, бо так нє може остац. Лєм, нє дай им Боже тото лєпше цо у нас ишло 10 роки... Остава лєм питанє: “хто кому припада и хто одкаль походзи?”