НЄ ЧИСТИ ВИСТИ

Мирко Горняк Коле

Знаце цо нова фора? МАК пременєл редактора! Маме шефа ми нового з князовства Регакового, на радосц цалей рускей нациї и феминистичней популациї. Понїжени и збешнєти, на уста ми идзе пена, цо сом бидни Богу згришел - шефовац ми будзе жена. Спадла ми цмота на очи, у устох ми цошка квашне, мушим слухац єдну жену - мили Боже яке страшне! Цо за чудо, цо то будзе, цо на то поведза людзе, под дириґентску палїцу жени чувствуєм ше угрожени, над МАК ше нацагли хмари - сцеме векши гонорари. Спаднул сом до нервней кризи, наполнєл сом кабел слизи, за потїху ми купце зизи. Шалїм ше. ганчи Марчи, як ю кресца, у роботи жадам шесца.

Шмишне ми кед локал-бабароґи вербално скакаю процив дроґи. Нїч нє видзели, нїґдзе нє були, вони лєм дзешка за таке чули. Нє знаю нїч о ґудри а правя ше мудри. Мнє престрашела вистка зоз ТВ-а – пошла Марґита зоз ЕКВ-а. Пред ню Милан, Боян, Чавке и Райко зоз Чорби – страцели битку без борби. Нє ґнявце младих, нє маце уплїву, алє им дайце алтернативу. Дроґа то чорт – нє бавце ше зоз чортом. Дроґа то шмерц – занїмайце ше зоз спортом.

Вибрана и Руска рада, кажда рада иста звада, реформисти, комунисти, Українци и Руснаци - пейцсто роки исти фаци. Нормално, у Рускей ради, знова нїхто млади – обчекуйце заш паради. Електоре, директоре, професоре, дохторе, цензоре – шицко єдно мнє то хоре. Нїяки мудросци, нїяки загадки, проста математика Союза и Матки. З Керестура и Коцура исти людзе – нова тура, зоз Нового Саду – контроловац Раду, зоз Бикичу и зоз Шиду – припатраю ше на биду, у Дюрдьове, Орахове – шицко исте – нєт нїч нове, и тоти з Вербасу блїзко при писпасу. Упачце ше на младих зоз Суботици – дзвигнїце з карсцельох рици. У обчекованю новей Наталки и масонки найдзце себе хоби – єдзце пез бомбонки.

Задумайце бесни хлїсти: на Дядьовим мемориялу чеченски терористи! Наоружани жени и дзеци малки, уходза на премиєру Наталки. Їх тактика цалком проста - борба за автономию Буджацкого моста. После першого подозривого руху, Дом култури дзвигню до воздуху. Же би ше защицело народни маси терористом ше понука джувечу и колбаси. Понеже на тото нє приставаю вони, понука им ше пице за два бони. З боку терористох предклади одбити, специялци руцаю паприґи згнїти. Шицки терористи падаю мертви, заобидзени цивилни жертви. Нєт нїч анї Наталки - рускей народней русалки.

Ище дацо най вам повем, то препорученє Влади Сербиї: нє грейце ше на струю бо вас одреме, а будзеце мац и рестрикциї. Я вам напишем поруку таку, мали ґерилов совит до МАК-у: идзце на пияц, накупце цибулї наварце вайца и пасулї. Найщирши совит народним масом – грейце ше зоз природним ґазом. Предклад чудесни яґод зоз сказки – преверце исправносц своєй ґаз-маски!!!

Верим же нє начкодзи кус шмиху, Ґерила кратша – алє у стиху.