Make your own free website on Tripod.com

ПОЗИТИВНИ НЕҐАТИВЦИ


 

Мирко Горняк Коле

 

После длугшого часу до милого нам Руского Керестура у орґанизациї Дома младежи (читай младежскей задруґи “МИ”) конєчно сцигол єден, ширшому авдиториюму, познати бенд. Бул то беоґрадски сосатав “Negative”. Цо най вам повем... концерт отримани 9. марца, а требал буц отримани 2. марца. Отказани є пре хороту шпивачки (звучи ґаднє, алє то пасирало Колейови бо на датум отказаного концерта могол пойсц до Нового Саду одпатриц горватску медийну атракцию, ґрупу ЛЕТ 3 зоз Риєки). Пре сам отказ виостала публика зоз сушедних местох, алє пошлїдки за тото зноши сам бенд. Концерт бул барз добри, млада и увежбана екипа зоз бенду попри своїх писньох грала и писнї од Ления Кравица, Ред Хот Чили Пеперс и други шветово познатих ґрупох, на задовольство керестурцох. Мала, алє весела екипа зоз “МАК”-у у составе Моника, Таня и Коле ше нашла “на месту злодїйства”. Кельо зме дознали зоз розгварки, беоґрадянє нїґда нє чули за Руски Керестур и за Руснацох, а знаю хто то Енди Ворхол, лєм нє знали же є наш, о чим би ше требали заштудирац ми, а нє вони. У официялней часци зме побешедовали зоз Ивану Павлович, вокалним солистом истого бенду. Гоч єй презвиско Павлович, випатра є нє Биялошова.

 

МАК: Прецо праве – “Negative”?

ИВАНА: Початок бул досц чежки, цо ше дотика даяких материялних и технїчних стварох як цо то перши концерт. Були зме нервозни, вадзели зме ше, и так, цо будземе, як будземе, та я гварела “Чловече, ту шицко неґативне, цо то?” и прето зме дали мено бенду “Negative” же би зме розбили малер.

 

МАК: Одкадз тота екипа зоз тобу?

ИВАНА: Стретли зме ше под час бомбардованя на Бежанийскей коси, у нашим краю. Джони и Влада грали акустични ґитари, пробовали зме дацо шпивац вєдно, я заказала пробу и так шицко рушело...

 

МАК: Яки упечаток на ваш бенд зохабели бенди типа “Guano apes”, “L7”, “Cranberries”, “Hole” (бенди чежшей катеґориї зоз женским вокалом)?

ИВАНА: Нє богзна яки. Ту єст лєм пар писнї хтори можеме видвоїц од тих ґрупох. Дацо цо дїйствує на нашу роботу то цалком други ґрупи.

 

МАК: Хтори то ґрупи?

ИВАНА: То, поведзме “Alice in Chains”, “Korn”, “Nirvana” и ґрупи зоз Сиєтлу, а члени бенду слухаю цалком другу музику як цо то (после консултациї зоз ґрупу) ґрупа “Primus”.

 

МАК: Чи ци плус чи минус же ши шпивала у ґрупи “ТАП 011” хтора форсирала даяку цалком иншаку файту музики?

ИВАНА: Дараз думам же то плус, бо ме людзе познаю, а за даєдни ствари думам же то минус. А я особнє думам же то нє ма нїякей вязи, бо я и далєй остала я.

 

МАК; Векшина шпивачкох после роботи у ґрупи настави зоз соло кариєру, а ти прешла зоз єдного бенду до другого.

ИВАНА: Га, то баш и нє бул бенд (ТАП 011), там людзе нє грали нїяки инструменти, а ту граю. Значи, друча форма ґрупи людзох. То бенд, а гевто була ґрупа людзох. Я соло вокал, алє думам же вельо интересантнєйше и продуктивнєйше робиц зоз вецей людзми, вецей думаня лєпше од єдного думаня, чи нє так Так, кед ше прави даяка писня або аранжман то робиме шицки. То робота у ґрупи, робота вецей людзох.

 

МАК: Чи женски вокал предносц чи нє у югославянским рокенролу?

ИВАНА: Кєльо ше мнє видзи, у нас то предносц бо их нєт вельо, цо ше дотика швета, думам же то шицко єдно, гоч думам же єст вецей хлопски вокали.

 

МАК: Зоз хторима бендама зоз иножемства би сце любели наступац?

ИВАНА: Нє мам пойма... Зоз тима цо сом их споминала, а ту и “Red Hot Chili Peppers”, алє то лєм сон... Од домашнїх бендох зме уж зоз велїма грали, але було то углавном ґрупни концерти. Нє верим же дахто од нас ма досц мали еґо же би другому бул госц, т.є. предґрупа.

 

МАК: Хтори хвильково рокенрол сцена моцнєйша войводянска чи беоґрадска?

ИВАНА: Я то нє роздвоюєм так, алє патрим хтора ми ше писня або ґрупа пачи. Най ци по правдзе повем , од домашнїх ґрупох нє слухам богзна кельо. Познам вельо людзох и вельо ґрупи зоз Беоґраду бо сом отамадз, алє то нє значи же ми ше дацо беоґрадске будзе баржей пачиц од, най лупнєм, новосадского.

 

МАК: Цо ци члени бенда подаровали за Осми марец?

ИВАНА: Нє видзели зме ше за Осми марец бо сом була зоз своїма лєґиньом, алє ми прешлого року Джони подаровал ружу. Я нє дацо запалєна за тото же хто ми цо подаровал або винчовал, думам же то красна ствар за младши особи хтори то дарую своїм мацером.

 

МАК: Як биш дефиновала вашу музику?

ИВАНА: То ше опитайце басистови Змоленови, вон ма феноменалну дефиницию, пробуйце го лапиц, ту є дзешка у комбию... (нє дал ше влапиц, заувага авторох).

 

МАК: Яки вашо упечатки зоз концерта, чули сце вообще за Руски Керестур?

ИВАНА: Мушим припознац же сом за вашо место нє чула нїґда, и нє знала сом як то будзе випатрац. Медзитим, було супер. З оглядом же зме пре хороту поцачли концерт за єден тидзень пришло вельо менєй людзох, алє заш лєм було супер.

(Влада, ґитара) Нє, я по нєшка нїґда нє чул же постої Руски Керестур.

 

МАК: А за Руснацох ши дараз чула?

ИВАНА: Нє, цо то ? (Ха,ха,ха). Нє, наисце сом нїґда нє чул