Make your own free website on Tripod.com

ТЕРОРИЗЕМ И РЕНЕСАНСА I


Мирко Горняк Коле

Патрел я вам Бивиса и Батхеда на Студию Б, кед претаргнута програма пре вистки ББЦ-а. Гоч барз почитуєм и ценїм ББЦ, заш лєм нє любим кед ме дахто претаргує у патреню рисованого филма. Моя перша реакция того 11-ого. септембра була: “Мамо, якаш будала ше залїпела на авиону до солитеру у Нюйорку!” Кед зровнани и други солитер, нападнути Пентаґон, БУЛО МИ ЯСНЕ ЖЕ НАПРАВЕНЕ ЦОШКА цо занавше пременї слику тей планети. Нїхто нормални нє мог анї штудирац же ше найдзе фанатик хтори киднапує авион и лупнє го до єдного од символох велького Нюйорку. Ище менєй людзох могли очековац напад на воєне шедзиско єдиней шветовей суперсили. Тwins тоwers-ох нєт, Америка достала у року од 20 минутох позауха так як нїґда у своєй историї, погинуло барз вельо людзох. Америка достала войну “на живо”, алє тераз на своїм терену. Тих дньох сом ше нє знїмал зоз телевизора.

Отворени нови бок у кнїжки о тероризму. То вецей нє тероризем хтори хаснує ЕТА у Баскиї, ИРА у Ирскей, або ХАМАС и ХЕЗБОЛАХ по цалим швеце. Авион може украднуц гоч хто кед го зна вожиц, може позабивац громаду людзох, гоч кеди и гоч дзе. Нємецка полиция приведла єдного Араба при хторому нашли упутства за воженє авиона, алє у упутству нє бул план за злєцованє. Тот вшелїяк нє мал намиру пойсц на авиону по бурек. У питаню добре орґанизована ґрупация вирских фанатикох хтора финансийно барз моцна, а на верху им образовани и интелиґентни людзе хтори порихтани на шицко. Им анї свой, анї цудзи живот нє препреченє же би поробели тото цо виплановали. Шветови тарґовински центер першираз нападнути 1993. року зоз бомбами кед погинули 6 людзе. Американци вишмеяли терористох же пробовали звалїц таки вельки будинок зоз обичнима бомбами. Наглашели же тот будинок мож звалїц лєм зоз експлозию на два трецини його висини. Почим Араби достали упутства, так и поробели. Тероризем ше зопера зоз розумом, а нє з воєну силу, цо Американцом нїґда нє було ясне. Обвинєни Осама Бин Ладен (нашо го волаю Младен, або Миладин), Авґанистан будзе вироятнє зровнати зоз жему, а муслимански екстремисти буду и далєй окончовац терористични акциї. И хто ту будзе побиднїк? Напевно нє цивилє хтори масовно вигиню. У заходних жемох влада вельки страх од авио-тероризма. Зменшало ше число людзох хтори путую, людзе ше боя од польопривредних авионох хтори можу буц хемийни або биолоґийни бомби. Биолоґийне оружиє може буц вирусне або бактерийне, цо значи же, спрам твердзеня експертох, може буц полнєне з вирусами тифуса, колери або антракса. Чловек хтори раз удихнє вирус антракса – може прейсц ґу ангелом. У велїх жемох ше людзе пририхтую за защиту од можлївосци  таких нападох. До Пакистану ше нїхто нє репи, исти им менталитет як и Авґанистанцом, алє су нуклеарна сила. Числени и демонстрациї у заходноевропских жемох процив нападох на Кабул, пре оправдани страх од новей габи тероризма, и опасносц од трецей шветовей войни.

Американци би ше требали заштудирац коло вонкашнєй политики хтору водзи їх жем, прецо вони муша буц найбитнєйши у шицких  кризох на планети. На концу, людзе нагнївани же плаца вельо пенєжи за особну безпечносц хтору, як ше указало, нє маю. Знаце, Палестинци и Изарїлци ше колю 2 000 роки, и нє маю намиру престац. Америка подпомага Израїл, а Арабом ше то нє пачи. Талибаном у Авґанистану “пукнул филм”, и случело ше тото цо ше случело. Почекаме цо о тим пове история.