КРЕАТИВНИ ЧУДАЦИ

Мирко Горняк Коле

Кед ше дакому удало дзвигнуц музични медийно пропаґандни прах на домашнєй рок сцени, то вшелїяк була горватска ґрупа ЛЕТ 3 зоз Риєки. Музично перфектни и скандалозни прейґ каждей гранїци, початком марца пришли до нашей жеми, направели ураґан, указали нашим гвиздом як ше прави концерти и врацели ше назад дому. Провокативни и радикални до болю (на бини граю цалком голи) за кратки час окупировали новини и телевизиї у цалей Сербиї (уключуюци и ПИНК!!!) и после 16 рокох упартей роботи дошли до того цо давно заслужели, а то слава и живот од музики. Ґрупа видал 6 албуми: "Two dogs fucking" ('89.), "El Desperado" ('91.), "Peace" ('94.), "Zivi kurac" (концертни, '96.), "Necuveno" (празни ЦД, '97.) и "Jedina" (2000.). Бенд обишол вецей держави як цо то Словения, Австрия, Французка, Италия, Мадярска, Шпания, Греческа, Алжир... Як сом дошол до интервюа зоз нїма нє мушице знац - будзеце ше шмеяц. Щешлїве читанє и меркуйце на жалудок.

МАК: Кельо вам ваша радикалносци помогла, а кельо одмогла у кариєри?

Лет 3: Лет 3 єдноставно таки бенд, цо значи же то нє лєм занїманє зоз музику (гоч вона у тим случаю наймоцнєйши уметнїцки вираз), алє способ же би ше виприповедала єдна комплетна приповедка. Чи то радикалне и кельо нам одмогнє , нє роздумовали зме у фази наставаня цалого проєкта. То єдноставно Лет 3 и од себе зме нє могли сцекнуц.

МАК: Яки вам третман у Горватских медийох, чи вас експоную чи цензурую? Кед оставаю ровнодушни то нє богзна яки медиї...

Лет 3: О нас ше у медийох барз вельо бешедовало и писало, так же и нєшка после двох рокох од виходу албума "Єдина" медиї з увагу провадза шицки нашо крочаї. Можеме повесц же други рок за шором за исти албум доставаме державну новинарску награду "Црни мачак" за найлєпши рок бенд и найлєпши видео спот "Драма", хтори режирал Радислав Йованов-Ґонзо. Тиж так за исти спот маме и номинацию за награду "Порин" (прешлого року зме тоту награду достали за найлєпши алтернативни албум).

У медийох ше вельо писало о нашим самозабойству, поставяню нашого 12 тони чежкого памятнїка "Бабин курац" (хтори ше хвильково находзи у музею вароша Риєки), як и о видаваню албума "Єдина" у лєм єдним прикладнїку...

МАК: Прецо тот албум видати у єдним прикладнїку, и опишце нам вашо ритуалне самозабойство.

Лет 3: Албум видати у єдним прикладнїку прето же нашо намири були викючно уметнїцки. Док зме го знїмали, заключели зме же ше роби о барз вредним уметнїцким дїлу. Було нам чежко умножовац материял (патрели зме на ньго як на вредну уметнїцку слику), так же зме одлучели же би вишол лєм у єдним прикладнїку и дали му мено "Єдина". Дошли зме до заключеня же у часох Моцарта и Бетовена нє постояла можлївосц знїманя музики, а заш лєм шицко совершено функционисало. Одлучели зме же наш албум будземе промовисац так же будземе ходзиц од вароша до вароша, од валала до валалчика у колони од нас сто, ношиц хлопа зоз велькима цицками и шпивац "Sisatog menose na glavanovo" (писня зоз спомнутого албума). Застановйовали зме ше на площох, тримали ше за руки и упивали божанску енерґию "єдиней". Фани дословно пошалєли, сцели и вони свой прикладнїк "Єдиней". Ми и нашо найблїзши приятелє Звоне и Давор (овци) и други лєсово животинї були процив того. Наша дискоґрафска хижа "Dallas" ше нє могла одупрец нападом публики и одлучела видац албум (пре вельку минутажу у трох розличних верзийох). Нєзадовольни зоз тоту одлуку, ришели зме вивершиц колективне самозабойство у Заґребу на площи Бана Єлачича. Нашо цела превежени до сушедней Словениї, точнєйше до Любляни. Цела були виложени на площи Франца Прешерна, пришол єден паноцец и зоз каждим од нас бешедовал. Так нам зоз своїм полним орґаном през анус удихнул живот, и ту зме знова медзи вами...

МАК: Нач тельо верзиї "Циклама"?

Лет 3: "Циклама" то любовна писня. Вона гутори о вичней любови спрам єдней жени. Як ше меня швет коло нас, так ше меня и тота писня, алє єй енерґия вше иста. Док єст нас, будзе и "Циклама".

МАК: Опишце нашей публики цо то "Федра".

Лет 3: "Федра" то театрална представа хтору режирал Ивица Булян. У нєй попри Лет-а 3 бавя Роберт Валтл, Ана Карич и Сенка Булич. Лет 3 за тоту представу направел комплетну музику и достал награду горватского ґлумища (то у нас дацо як Оскар). Одбавели зме ю коло 100 раз и обишли пол швета. По округлих столох на шветових фестивалох ше бешедовало же то єдна од найлєпших представох нового театру у тей хвильки.

МАК: Яке чувство грац у Новим Садзе 1990. року як домашнї бенд, а яке грац на истим месце 2002. як странски бенд? Чи сце ше у Войводини чувствовали як странєц, чи як домашнї?

Лет 3: Нє роздумовали зме вообще о тим, нє мам нїяке думанє. Музика пребарз моцне опойне средство хторе неґирує рацио.

МАК: Чи албум "Necuveno" так наволани, прето же є таки як му гвари мени, чи прето же на нїм нїч нє чуц (Ne-cuveno).

Лет 3: Албум "Necuveno" специфични албум. Сцели зме направиц албум хтори нї на яки способ нє будзе дїйствовац на людзох. Кед положице ЦД до ЦД-плеєеру, на дисплею будзе виписане же ЦД-а вообще нєт, цо значи же и коло вас нїчого нєт и же нєт нїч важнєйше од вас и вашей власносци. Под час аґресивних нападох на людски чула, закючели зме же таки проєкт нєопходни, вредни уваги и точно таки як му наслов и гутори.

МАК: У "Ферал"-у сом читал о завераню клуба "Palach" у Риєки. Опишце нам тот клуб.

Лет 3: Клуб "Palach" леґендарне место дзе зме препровадзели дословно пол живота. Там настала цала риєцка рок сцена, през нього предефиловала цала бувша югославянска сцена. Клуб хвильково роби до 23 годзин, концертох нєт, сцена вецей нє така як цо була. У плану якашик страшна изолация од ґалами.

МАК: Чи у Горватскей мож жиц од музики?

Лет 3: Ура! Лет 3 жиє лєм од музики.

МАК: Цо робице приватно?

Лет 3: Га, Звоне, Давор... шицки ше вєдно караме до задку...

МАК: Питанє хторе сом поставел и Милейови зоз ґрупи "Хладно пиво" чи пиратски знїмки ваших албумох у Югославиї вецей хасновали чи чкодзели вашому бенду?

Лет 3: Пирати крадоше. ШМЕРЦ ПИРАТОМ !!!