Make your own free website on Tripod.com

БАЧКИ ЗАҐРЕ СТУХПА ШЕЯ


Мирко Горняк Коле

На вельку радосц шицким прихильнїком панка и шицким людзом хторим ше зґадзела политика и национализем за остатнї дзешец роки, до Нового Саду пришла леґендарна  заґребска ґрупа Хладно пиво.

Хладно пиво то бенд хтори функционує 14 роки, вон под час Франї Тудьмана бул свидомо заобиходзени зоз медийох пре отворене нєскладанє зоз таку политику и пре, найблагше поведзено, опасни тексти. Но, и попри тим шицкого, ґрупа постала барз популарна, як у Горватскей, так и у нашей жеми. После пременки системи у Горватскей, могло их часто видзиц на ГТВ - у, а остатнїм чаше и на наших телевизийох. Дня, 15. юния, пред концертом у клубу НС тайм, мали зме чесц и задовольство приповедац зоз Милетом, шпивачом, автором текстох и фронтменом ґрупи Хладно пиво а, то єден з барз ридких интервюох хтори з нїм направени у Юго-медиї.

МАК: Витай у Войводини, нє чувствуй ше як госц, алє як домашнї, ту ши наш.

МИЛЕ: Дзекуєм ци.

МАК: Поведз нам дацо о вашим новим концертним албуму Источно од ґайница, дзе є зняти, за яку хижу є видати и чи будзе лиценцно видати у Сербиї?

МИЛЕ: Видати є за Данцинг беар, зняти є у Творници. То єден барз добри заґребски клуб, дзе госцовали Рамбо Амадеус, пред мешацо-дваома и Коя (Дисциплина кичме), дзе приходзели надосц вельки бенди, дзе грала и Апоцаляптица. Албум зняти за два днї и нє знам чи будзе лиценцно видати у вас, бо думам же нєт интересу при сербских видавательох же би ше борели процив числених пиратох.

МАК: За вас, напевно, велька чкода же ше шицко тото пиратизує?

МИЛЕ: Финансийна чкода вшелїяк велька, алє зме им з другого боку барз подзековни, гоч глупо звучи, алє вони нас промововали кед то нє було можлїве прейґ даяких виданьох хтори леґални. Медзитим, кельо нам финансийно одмогли, тельо нам пропаґандно помогли же би людзе у Югославиї, Босни и других жемох чули за Хладно пиво.

МАК: Як пременка власци у Сербиї и Горватскей уплївовала же бисце ту пришли грац?

МИЛЕ: Чежко би ми пришли ту кед би ше то нє случело. Кед би нє пришло до тих пременкох, ми би ше и далєй дописовали прейґ интернету и нє верим же би концерт бул пошвидко. Ми дефинитивно нє можеме сцекац од политики и було би глупе грац даґдзе дзе це людзе нє сцу пре политични причини.

МАК: Чи сце у Горватскей мали проблеми пре политични тексти?

МИЛЕ: Ми перши бенд хтори отворено поволал на политични пременки у Горватскей, и гварели зме же би людзе требали гласац най пойдзе ГДЗ, алє зме нє були нїяки мученїки бувшого режиму, и нє малтретовали нас, углавним нас иґноровали, а ми шпивали о своїх стварох хтори нас муча.

МАК: Поведз нам же кельо людзе у Горватскей знаю за югославянски ґрупи хтори настали коло 1990. року?

МИЛЕ: Релативно слабо знаю, алє сом ше нєсподзивал кед Атхеист рап у Заґребу мали прейґ 1000 людзох. Значи же и ту постої комуникация хтора двобочна, то способ же би людзе дознали за бенди хтори нїґда нє були на телевизиї, або на радию. Єдноставно, кед ЦД добри вон дойдзе кеди-теди до публики.

МАК: Микич, Шокота, Балабан. Хто найлєпши (напад Динама зоз Заґребу, заувага автора)?

МИЛЕ: То ши уж одвитовал. Нє знам,  добри су шицки троме, даваю ґоли. Можебуц Микич добре пребива одбрану.

МАК: Хторе пиво, после Хладного пива найлєпше у бувшей Югославиї?

МИЛЕ: Знаш цо, кед ше шицко тото случело, я мал 17 роки и, щиро поведзено, нє поспишело ше ми коштовац шицки файти пива, нє бул сом ище нацагнути на пиво. Можем ци повесц же ми ше пачи Єлен пиво и його прилаплїва цена. У Горватскей пиєме Ожуйске пиво, хторе нє таке квалитетне, алє пасира ґу шицким файтом єдзеня, можеш ше опиц, а наютре це нє болї глава. Углавним, пиєме роботнїцки пива, поллитрово зоз нормалних фляшох.

МАК: Миле, дзекуєм ци же ши пристал на интервю, жадаме ци успишни наступ.

МИЛЕ: Дзекуєм и я тебе.