Make your own free website on Tripod.com

ШИЦКО ЦО СЦЕ СЦЕЛИ ЗНАЦ О РУЦКЕЙ КАТЕДРИ, А НЄ ШМЕЛИ СЦЕ ШЕ ОПИТАЦ


Oлеґ Колбас Colby

Хто ше уписує на Катедру и прецо?

Студентох на Катедри бизме могли подзелїц на два ґрупи половка тих цо ше уписали зробели то нє пре студиранє на нєй, алє пре одкладанє войска, предлужованє доставаня рижних додаткох за школованє, прето же ше нє уписали на даяки други факултет хтори жадали, пре приход до городу зоз валалу и подобне. Половка од тей половки ше после упису вецей анї нє зявює на факултету, а гевти други ше упущую до авантури хтора ше вола студиранє на Катедри за руски язик и литературу. Друга ґрупа, вельо менша, а творя ю особи хтори жадаю преучовац мацерински язик и литературу. То жалосне, алє то факт. Процентуално 90 одсто студенти Руснаци зоз  наших местох.

Яки квалитет знаня достава студент Катедри?

Треба припознац же о Катедри єст вельо предубедзеня у смислу же то лєгко студирац, же после нєй нє мож достац роботу у фаху и же з Катедру нєт перспективи. То нєточне. Статистика гвари же од 1986. по 1998. рок дипломовали  штернацецеро студенти и шицки вони маю стаємну роботу як новинаре, лекторе, професоре... Обсяг знаня, як и квалитет, котри студент зддобудзе найбаржей завиши од самого його анґажованя, поготов прето же ту попри стаємних предметох єст и рижни трибини, семинари, курси, презентациї, литературни вечари, а и животна школа нє за занєдзбованє.

Слово, два о предметох

Ту ше зявює проблем. Предмети хтори студент слуха по руски єст вельо менєй як тоти цо слуха по сербски. Професоре на сербских предметох, знаюци же Руснацом сербски нє мацерински язик, досц олєгчую покладанє испитох (шмерц винїмком), а нашо професоре, знаюци же єст вельо чежши сербски предмети, тиж олєгчую покладанє. Кед ше вежнє до огляду остатнї период кед пре войни, штрайки и подобни обставини скоро кажде условиє за упис нового школского року було зменшане за испит або два, мож повесц же терашня ґенерация мала барз вигодни условия за студиранє, голєм зоз студентского боку патреня. Зоз диплому законченей Катедри нїби мож робиц и як професор сербского язика у штредкох дзе сербски нє мацерински язик. Гварим нїби, бо од тих цо дипломовали, кед ше нє спреведам, нїхто нє роби як професор сербского язика, та ше поставя питанє чи потребни предмети як цо то сербска народна кнїжовносц, стандардни сербски язик итд. Пошлїдок такого одношеня  предметох по руски и по сербски то професоре руского язика хтори добре знаю сербски язик и литературу, а кобуря зоз мацеринским, окреме кед  су нє зоз гомоґених руских штредкох. Та цо тераз сцеме: чи професора зоз диплому руского язика, чи професора зоз знаньом  руского язика?

Заключенє

Шицко горе наведзене треба подробнєйше анализовац, на фаховшим уровню и вибрац найлєпше ришенє медзи можлївосцами и жаданями. Будуци студенти Катедри за руски язик и литературу у Новим Садзе можу буц прешвечени же науча вельо вецей як цо думаю, здобуду нови искуства, упознаю велї нови особи и шицко тото им будзе хасновац кеди-теди. Можебуц аж и у Канади.