Make your own free website on Tripod.com

ALL ABOUT EVE, WHAT ABOUT ADAM?


Мирко Джуня

После седем рокох од видаваня зборнїка, читаня и писаня о истим, вишвицую ше даяки нови замеркованя, диктирани з боку актуалносцох чечуцей животней динамики. Насампредз би, ознова поцагнуц спомнуту диференицияцию наспрам сербскей скарбнїци тей файти, чого ше и Тамаш дотика у уводней рецензиї. Феномен Руснацтва (и далєй) у процесу кодованя власного идентитету и през таку форму наглашує свойо специфичносци. Праве за то добри способ спомнуте поставянє наспрам векшинскей (асимилиюцей) култури. Спонтани асоцияциї на Бокачового “Декамерона”, най лєм медзи иншим спомнєм, зоз зроднима конститутивнима елементами гумору, луцидних демистификацийох на рахунок паньства, крактеристична приповедна атмосфера и подобне, наруцую лоґични цивилизацийни розгранїчованя до котрих, нормално, и Руснаци уходза. Домерковани читаче замеркую и заключа сами. Читам кедиш у чечуцей преси же тайландски власци поцагли зоз хаснованя  нови учебнїки за сексуалне воспитанє школярох, почим, як новинка наводзи, у тексту кнїжкох ше на вецей местох зявюю “нєдошлєбодзуюци” ласцивносци типа “плясканє маймуна”, “гласканє мачички” – а цо ше конкретно одноши на поглавє о маструбованю. Думам же у розбераню табуа тей файти, голєм цо ше нашей локалней образовней политики дотика, дїла як цо “Еротика Рутеника” релативно адекватни параметер и ориєнтир за роботу. А цо єдна цалком здрава потреба и нужносц, понеже нам дзециска уж у основних школох “доросли” по сотонизем, орґанизовани криминал, дзецинску проституцию... Дроґи, алкогол и куренє анї най нє споминам.

Далєй, ту и нєзаобиходна очиглядна фрустрованосц нашого просекового пиркоша. Почало зоз Тамашовим замеркованьом на рахунок коментара гевтого Митьового Македонца цо го привед раз до валалу на кирбай, чи уж з якей нагоди; же “Чом Руснацох єст так мало кед ше Рускинї так дзечнє любя гашиц...”. Далєй ше фама предлужовала ище у часох покойного пароха Макая зоз вишвицованьом факта о (коло) тристо старих леґиньох у валалє. Кулминовало зоз Винковим текстом и явним поставяньом питаня же прецо ше валалчанки (дзечнє) даваю перцошом зоз околних хотарох. Чуєм же ше проблематика преширела скоро на уровень нєурядовей трибини з нагоди Маковей керестурскей презентациї. Нє знам цо жени з тей нагоди поведли. Ей, дзе часи кед локални биткоше намиряли Коцурцох (и обратно) за одняти риби.

Ниа, на концу, по своїм подлим обичаю, мудруєм доокола место о кнїжки. Людска сексуалносц як и сам живот донайпосле, ултимативно вимага свою, часто нєрозумлїву и апсурдну афирмацию и манифестацию. Комплетни чловек длужен спрам Бога, природи и себе обрациц увагу (и) на тот аспект своєй особносци. Комплетни Руснак, заш, годзен буц певни у намаганю винайсц власни “Модус вивенди” (та и операнди), читаюци нашу домашню “Еротику”. Кнїжка гоч кельо нєпрентециозно-документарна (озда як цо и народ зме), або литературно чи животно ефемерна лєбо марґинална (цо би могло буц заключенє нєдомеркованого, односно фалшивого, чесного читача), най до фахового обробку тераз нє заходзим – понука даяки витални одвити на тему о котрей слово. Архетипски руски Адам и Ева ище як ше знали виегзалтирац у своїх екстазох. Їх крев и нас ище вше нє запшела.