ИНФОРМАТОР ЗА ШИЦКИХ
Александра Дудаш
У цилю цо лєпшого информованя младих, алє и шицких других хтори сцу участвовац у нових проєктох, МАК ше намага презентовац интересантни идеї, проєкти и роботи, а вязани су за културу, образованє...
О Информатору за мултикултуралносц за МАК бешедує проф. др Янко Рамач, член Редакциї того часопису.
МАК: Цо то Информатор за мултикултуралносц и о яким ше проєкту роби?
– Информатор за мултикултуралносц виходзи у рамикох Центра за мултикултуралносц, хтори финансує Фонд за отворене дружтво. Центер основани 1996. року. Наставанє, друкованє и финансованє оможлївюю и Союзне министерство националних и етнїчних заєднїцох, як и спонзоре. Часопис виходзи раз у двох мешацох. Потераз вишло 30 числа. То информатор хтори ма задаток информовац людзох о културним и националним живоце шицких националних заєднїцох хтори жию на териториї Войводини, о їх проблематики, живоце и правох.
МАК: На хторим язику виходзи Информатор и хто пише статї?
– Його змист найчастейше на сербским язику лєм прето же ше намагаме же би шицки розумели о чим ше роби, бо вон ма задаток информовац читачох. Алє нє виключена можлївосц же би авторе писали и на мацеринским язику, бо авторе текстох представнїки одредзених националних заєднїцох. Дзепоєдни тексти ше прекладаю на английски язик. Статї пишу шицки хтори маю цо повесц на одредзену тему, прето же числа тематски, алє єст и статї хтори информую читачох о актуалних случованьох и проблемох одредзених заєднїцох. Авторе нє условени зоз роками, так же єст и младших и старших. Важне лєм же би мали цо повесц и же би були добре информовани о теми о хторей пишу, т. є. же би були компетентни. То углавним новинаре хтори робя за даяки медийни установи. Тиж так нам ше явяю и авторе хтори жию у дияспори у швеце. Вони жадаю писац и пласовац информациї далєй же би и други були информовани.
МАК: Гварели сце же числа тематски. хтори то теми?
– Потераз то були теми о култури, образованю, положеню женох, Националних радох... Важне же теми актуални и же интересую векшину читачох, бо кажде сце знац цо ше случує у його дворе. Остатнє число ма тему “Улога нєвладових орґанизацийох у витворйованю меншинских правох”.
МАК: Хто потераз писал од руских авторох?
– Потераз то були: Мария Ерделї, Мирко Джуня, Славица Сендерак, Александра Дудаш, Яков Кишюгас, Блаженка Хома-Цветкович, Юлиян Тамаш, Михайло Рамач, я...
МАК: Як ше Информатор дистрибує ?
– Затераз ту маме мали проблеми алє ше намагаме ришиц их и прешириц мрежу, бо жадаме же би Информатор дошол до каждого кого интересує. Тераз го посиламе медийним установом же би були у цеку и же би могли хасновац информациї и буц информовани.
МАК: Як мотивовац младих же би писали за Информатор и як можу дойсц до вас?
– Думам же гонорари наисце добри и же шицки буду задовольни. Намагаме ше наградзиц авторох за їх роботу. Заинтересовани нас можу найсц на адреси: Центер за Мултикултуралносц, Жєлєзнїцка 35, Нови Сад, або на е-маил адресу: cmkinfo@eunet.yu. Шицки суґерованя и критики прилапюєме.
МАК: Плануєце даяки промоциї Информатора?
– Гей плануєме правиц промоциї же бизме цо лепше информовали людзох о нашей роботи. Мали зме першу промоцию у Бачким Петровцу. Затераз планована промоция у Руским Керестуре концом фебруара, а на далєй ище увидзиме. Маме намиру обисц шицки места по Войводини дзе жию национални меншини, презентовац нашу роботу и позберац цо вецей сотруднїкох.