Make your own free website on Tripod.com

Я - ХРИСТИЯНКА ЧИ ЄВРЕЙКА?


Даниєла Штайнфелд

Кед сом була мала, баба по мацери ме водзела до церкви, а оцец посилал до єврейских лєтнїх кампох. Сцела сом, спознац тот мацеров грекокатолїцки и оцов єврейски бок. Алє, я спознала тот штредок, алє нє златни, напроцив, нємилосердну полемику хтора кучи у мнє и джобе ме: Даниєло, хто ти? Кому припадаш? Вибер! Вибер!

Питанє идентитету, кед ше дума на националносц, верим же велїм нє лєгке. Я дзецко зоз мишаного малженства и верим же ми тото питанє вше останє отворене. То нє питанє же чи єврейска, чи грекокатолїцка вира наклада лєпше, та анї нє питанє чи уквилїм мацер, чи оца, вибераюци процивну националносц од їх кореньох. То питанє штредка и людзох коло мнє. З якима очми патра на мнє? На яки очи? Чи на очи Єврейки, хтора ма походзенє од тих ултра-богатих и скупих людзох цо ше виками колю зоз Арабами за мали фалаток жеми, чи на очи Рускинї по чиїх венох чече крев тиж скупих людзох, алє таких цо, нєже нє даю цудзим, алє анї своїм? А у хторих людзох ше баржей цешим; бо мам їх креви? З Костельником, Енди Ворхолом, чи з Айнштайном, Марксом и Енґелсом?

Вше и вшадзи сом винїмок: медзи Руснацами Єврейка, медзи Израїлцами Югославянка, а медзи югославянскима Євреями Рускиня! Вше интересантна по тим питаню за вишмейованє и хвалєнє: дакеди ше людзом пачи моя комбинована националносц, наприклад, кед ме раз єден углядни новинар Лондон тимес-у чул як бешедуєм по руски, нательо ше нєсподзивал, же єдну цалу годзину знїмал мою бешеду на диктафон и випукал филм на мнє таки бул нєсподзивани. Алє, нє интересовала го я, алє моя националносц. А дакеди, ше людзе приду нароком упознац зо мну, лєм же би упознали єдну Єврейку. Заш лєм, як мала сом у єдним периодзе страцела шицки пайташки прето же єдней з нїх баба гварела же би ше нє пайташела зо мну, бо, як гвари: Євреє розопяли Христа. Потим, кед раз єден милицаєц опатрал мою особну карточку гварел ми же шицких Єврейох требало штреляц у Другей шветовей войни, а я най ше ношим до тей керестурскей селендри! (Або директна бешеда?) А кед сом з Израїлу писала дому, нормално по руски, мойо парняки ше нє могли вишмеяц з того, як цо вони гварели: нїчийого язика.

Гоч як швет патрел на мнє, я будзем гордо стац за своїм презвиском и родним крайом, будзем чувац у себе по дакус з обидвох бокох. Алє, кед ми ше дахто дакеди опита хто сом, повем просто: Даниєла Штайнфелд. Националносц: просто Я.