МЛАДИ И ФЕСТИВАЛИ
Наташа Регак и Моника Будински
Шицки знаме же лєм фестивали и вельки швета можу позберац векше число людзох на
єдно место, голєм раз рочнє. Фестивали як “Червена ружа”, “Коцурска жатва” або
“Костельникова єшень” постали традиция, бо як бизме иншак исновали и очували
културу кед би их нє було? Скорейших рокох фестивали представяли “радосц” як за
старших так и за младших, медзитим, з часом публика указала же задумки тей файти
“уж видзени” и “дотхнути” зоз велїх бокох, и же су нє цикави як цо були скорей.
У чим хиба? Чи би уключованє младих до того нє могло помогнуц? (Вони дакеди мали
свою учасц у рамикох “Ружовей” манифестациї зоз успишним початком
“Керестурияди”. Нажаль, того вецей нєт. То так нє лєм у Керестуре, алє и у
других руских местох).
Младим, вшелїяк,
треба дац нагоду же би ше културно виражовали, а млади би тото довириє требали
дакус баржей почитовац и озбильно ше прилапиц организациї. Креативней младежи
єст, лєм ю треба активовац на прави способ, под условийом же ше ю прилапи як
компетентну за сотруднїцство и понукнє єй можлївосц витвориц “швижи” идеї и
задумки.
Пре якушик
причину, єдна часц младежи вше порихтана чекац же би єй дахто други орґанизовал
розвагу. Дакус би ше требали “пообрацац коло себе” и обачиц же вони сами себе
муша орґанизовац дацо. З другого боку, тому дакус и старши помогли прето же вше
були порихтани орґанизовац младим цошка цикаве (або нє), алє зоз тим нєсвидомо
помогли и творенє габи, на єден способ, деґрадованей и “пасивней ґенерациї”.
Ту ше младим
поставя питанє же прецо ше и надалєй шири файта неґативней думки, у смислу: “Най
то дахто други пороби”. Чесц винїмком! Пред даскелїма роками зявела ше,
наволайме то “револуция младих” – хтошка ше здогаднул же би ше млади, хтори на
даяки способ креативни, могли представиц публики през активне и явне
сотрудзованє, як цо то наприклад “Дньовка”. Скорей були организовани и вечари
поезиї и концерти слуханих ґрупох, а тераз ше, як єдна форма колективного
друженя, з часу на час организує,
united party. (Но, алє то ше нє дотика
тельо самих фестивалох, лєм сцеме наглашиц же и млади знаю буц активни.)
Як алтернативу
проблему “празних шедовискох под час манифестацийох” предкладаме уключованє
младих, понеже руска младеж ма свою организацию под меном
PACT
RUTHENORUM
хтора, медзи иншим, орґанизована и пре проблем
“устатосци” при младих, а чийо члени достаточно активни, креативни и способни
потримац и витвориц дату обовязку (наприклад часц “Костельниковей єшенї” хтора
була орґанизована з боку членох тей младежскей орґанизациї).
Младежи ше вше
вецей понука можлївосц указац и розвивац свой талант и здобуц учасц у креированю
културного живота. На нїх остава же би то вихасновали на найлєпши можлїви
способ, а на шицких других (и старших и младших) же би их у тим потримали.