УПЛЇВ РУСКЕЙ КУЛТУРИ НА УМЕТНОСЦ ЕНДИЯ ВОРХОЛ

Атила Ковач

            По дзепоєдних думаньох сучасни руски националиста место образа даякого святого на своїм муре трима слику, або даяке друге дїло Ендия Ворхола, найпознатшого уметнїка Поп арту, а источасно и найпознатшого Руснака терашнього часу.

Дакус нєзвичайно бешедовац о уплїву писанкох за Паску, або других мотивох хтори найпрепознатлївши за руску народну уметносц, а же би ше тоти елементи препознали у дїлох уметнїка хтори ше занїма зоз продуктами сучасних рокох. Конзерви, офарбена Мерилин Монро, Мао Це Тунґ и други дїла хторих ше перше здогаднєме кед слово о Ендийови Ворхолови, на специфижни способ часц сучасней рускей култури.

Кнїжка Реймонда Хербеника (грубеняк) "Вирски и етнїчни уплїв Ендия Ворхола, толкує даяки аспекти його творчосци зоз хторима ше историчаре уметносци тельо нє занїмали. Наводзи ше же Ворхол бул релиґиозни чловек, ходзел до церкви, притримовал ше обичайох, гоч кельо то на перши попатрунок випатра процивсловне його творчосци. Поп арт нє зна за етнїчну або було хтору позадину, а анї нє важне походзенє автора, кед ше його уметносц базує на продуктох сучасного, индустрийного часу, у хторим ше попри металу хаснує и пластика, стиропор и други штучни материяли, и преважно шицко тото цо випатра безособово, цо ше продукує на гушенїцох у вельких количествох.

Гевти хтори дакус лєпше познаю уметносц Ендия Ворхола знаю же окрем вилїзаних дїлох хторих ше перше здогаднєме, може ше найсц и рисунок зоз образом Исуса, типични у Рускей церкви. грубеняк у своїх кнїжкох бешедує о фарбох хтори ше хасную за писанки, а фарби нєзаобиходни елемент при Ворхолови. При дїлох хтори як основу маю даяке друге дїло, автор може лєм пременїц фарби же би направел нове. И  наисце, кед патриме було хтору його познату слику, здобуваме упечаток же патриме дводимензионалну писанку за Паску. Фарби на Ворхолових сликох и писанкох исти, аж ше и даяки мотиви можу препознац. Пробованє же би ше писанка зоз типичнима мотивами и узвичаєнима фарбами положела коло слики Мерилин Монро, дава нєвироятни резултати. Найпознатша плавуша як писанка може буц надурнїста думка, алє Поп арт допущує шлєбоду же би ше и на таки способ могло патриц дїло.

Вельке число дїлох Ендия Ворхола ма прикриту етнїчну позадину, дзе ше лєм дзепоєдни елементи можу ясно и директно збачиц, а познаванє його живота зоз перспективи уметнїка хтори припада єдней ґрупи хтора ма ясно препознатлїви мотиви и же тоти мотиви и далєй жию, и же ше аж стретаю у каждодньовим живоце, дава нам лєм дополнююци информациї о його роботи.

Дробни деталї по хторих ше препознава векшина руских обисцох, та аж и у сучасним и урбаним швеце и далєй жию. Уплїв рускей уметносци и етнїчних прикметох Руснацох при Ендийови Ворхолови потребне патриц лєм на тот способ, бо би шицко друге було националистичне зраженє, хторе Поп арт нє церпи.

Так же кед сцеце буц або остац сучасни, урбани руски националиста, на свой мур заквачце даяку слику Ендия Ворхола.