КЕД ШЕ ҐЕНИ ЗЕЗАЮ

Интервю з Атилом Ковачом

Атила Ковач, 28, роки, дипломовал режию за театер, филм, радио и ТВ у Новим Садзе. Робел у новосадскей опери и театре. 5 роки на ТВ Нови Сад. Жиє у Бачкей Тополї. У януару 2000. року орґанизовал конференцию о сексуалних меншинох. Порушал AMNESTY INTERNATIONAL за Югославию, а того октобра перши часопис за гомосексуалцох на Балканє.

*Почнїме од твоєй прешлорочней конференциї.

– Ище на ТВ Нови Сад робел сом емисиї о сексуалних меншинох и писал социолоґийни студиї (статї) за маґазин “Симпозиюм” хтори перши у Югославиї почал писац о сексуалних меншинох. Праве вони и предложели конференцию о тим, о чим ше мало приповедало и цо бул подполни ТАБОО. Конференция отримана у януару 2000. року у Новим Садзе и то була практично перша така на Балканє. Шицко прешло добре, думам на реакциї людзох. И учашнїки и половка нащивительох були гетеросексуалци котри пришли видзиц о чим ше роби. Нє мали зме проблеми зоз полицию, нє реаґовала даяка гомофобична орґанизация.

*За розлику од GАY PARADE у Беоґрадзе.

– Я такой гварел же орґанизаторе погришели, насампредз, час отримованя митинґу. Бо тих дньох Слободан Милошевич випоручени до Гаґу. Значи, политична атмосфера нє одвитовала такому збуваню, а вец того дня у контрамитинґу зявели ше радикални националистични орґанизациї. Думам же у такей атмосфери гоч як конферениция орґанизована, подобне би ше случело. Орґанизаторе GАY PARADE рушели такповесц аґресивно, на улїчки, мож то було и иншак зробиц, можебуц би лєпше було место Беоґраду шицко орґанизовац у Новим Садзе. Научени жиц зоз другима меншинами, етнїчнима а и релиґийнима. Наприклад, пририхтовали зме трибину AMNESTY INTERNATIONAL, а у Кралєву як проблем ше зявел же мойо мено нє сербске. Думам же то лєм прето же тоти людзе нє научели жиц зоз другима меншинами. У Беоґрадзе ше указало же зме нєтолерантни людзе и випатра же нє угрожени лєм гомосексуалци алє и други меншини, антисемизем напр. Така ситуация настала после виберанкох, ствари ше пременєли и кед после 10 рокох пресия попущела, людзе нє були порихтани за дацо нове и иншаке.

*Як функционує орґанизация?

– Ми нєвладова орґанизация NEW AGE RAINBOW у хторей попри того же зме по сексуалним опредзелєню вимишани, алє тиж так и по наших других уровньох. Трудзим ше сотрудзовац зоз подобнима орґанизациями, бо ту постої ище єден проблем а то нєцерпеня медзи меншинами, релиґийнима, етнїчнима и сексуалнима. Нєтолерантни меншини медзи собу, єдна зоз другу, и кед же ше то нє пременї будземе мац ище вецей проблеми. Но, ми ше трудзиме робиц иншак бо важне тото же зме иншаки, а то нє проблем алє предносц. Окрем других орґанизацийох, повязани зме и зоз европску ґрупу ILGA (INTERNATIONAL LESBIAN GAY ASSOTIATION) котра тераз отворела кондзеларию у Бриселу и ма специялни статус и при Союзу Европи и при Европскей Униї. А як ґрупа ма представителя у европским Парламенту.

*Як у нас проблеми сексуалних меншинох ришени зоз законом?

– На союзним уровню, 1994. року зоз законом ришене лєм тото же гомосексуализем нє илеґални.

*Чи єст податки о чишлє гомосексулацох?

– Теоретски минимум 4одсто и у нашей жеми одприлики єст 500 000 гомосексулацох. Єст вельо тих цо ше дефиную як бисексуалци, а то значи же то GAY особа за фамелию.

*Мож повесц же буц GAY постало тренд?

– Нє, лєпше поведзене же медзи гомосексуалцами тренд постало нє скривац свойо опредзелєнє и прето ше можебуц видзи же число GAY популациї рошнє.

* За це можебуц каждодньове питанє: як реаґує стредок, родичи, колеґове, твоя баба?

– Мойо родичи и вообще шицки коло мнє знали и знаю хто сом и цо сом и зоз ким сом. Як то други прилапя завиши, насампредз од того же як ше я поставим. Мойо родичи видзели же я жиєм нормално, же я нє мам проблеми, а тото же чи я мам дзивку чи леґиня, то нє їх ствар. Тиж так, на роботу ме волали як професионалца а нє як гомосексуалца. Думам же я єдини так отворено бешедуєм о тим, дал сом вельо интервюи, обявени мойо фотоґрафиї и нє мал сом прето проблеми.

* Обачлїве число гомосексуалцох у креативних професийох, уметносцох...

– Нєдавно доказане же хипоталамус при гомосексуалцох векши як при гетеросексуалцох. То нє деформация, алє цошка ґенетски одредзене як напр. фарба власох. Медицина гвари же ше то ґени так зезали, а нє зоз власами. Велї думаю же “хиба” у фамелийох. Алє по моїм думаню то можебуц лєм случай, же критични катеґориї нє фактор. Алє, правда же сензибилитет гомосексуалцох цага ґу уметносци, т. є. каждей креативносци.

* Очекує ше перше число GAY маґазину.

– После случованьох у Беоґрадзе достали зме помоц од Гелсиншского одбору и у октобре треба же би вишло перше число маґазина “Дечко” у поднаслове SRAIT FRIENDLY. То перши таки часопис на Балканє и уж маме велї контакти и ексклузивни интервюи. Очекуєме же бизме достали интервю од Жан Пол Ґотєа, городоначалнїкох Паризу и Берлину котри GAY, контактовали зме зоз GAY орґанизацию британскей полициї. Очекуєме же ше нам уда представиц познатих и успишних гомосексуалцох. Як уметнїкох, так напр. и политичарох чийо число ше вше вецей дознава, як у швеце так и нас. Попри того будземе мац и рубрику “Югославянска GAY дияспора”, бо єст вельо людзох котри до иножемства пре други причини пошли и прето же су гомосексуалци. “Дечко” будзе мешачнїк, екипа у редакциї мишана, нє шицки зме GAY . Робиме углавним у Новим Садзе, затераз без формалней кондзелариї же бизме случайно нє мали проблеми. Велї ше нам явели хтори зацикавени за таку тематику, уж зме порадзени за розменьованє текстох... Сцем повец же зме тераз потримани, цо барз вельо значи.